IUCN CEC Chair’s Youth Award Winner

IUCN CEC Chair’s Youth Award Winner

23 July 2012 | News story

Vedharajan Balaji of India has been awarded the IUCN CEC Chair’s Youth Award for his outstanding work to restore coastal environments and raise awareness amongst local communities and children of the importance of coastal ecosystems.

For full article click here

ஜிபிஸ் – மீனவர்களின் உயிர்காக்கும் நண்பன்!

கட்டுரை : முனைவர். வே. பாலாஜி     

கடலுக்கு மீன்பிடிக்க செல்லும் மீனவர்கள் ஒவ்வொரு நாளும் பல்வேறு இன்னல்களை சந்திக்க வேண்டியுள்ளது. எவ்வளவு இன்னல்கள் வந்தாலும், வேறு எந்த தொழிலும் தெரியாத நிலையில், குடும்பத்தை காப்பற்ற தினமும் தமிழக மீனவர்கள் கடலில் பயணித்து கொண்டுதான் இருக்கின்றார்கள்.

நம் தமிழகத்தின் முக்கிய புரதசத்து ஆதாரமாக விளங்கும் கடல் மீன் பிடி தொழில், நம் நாட்டிற்கு பல கோடி ருபாய் அந்நிய செலவாணி ஈட்டி தருகிறது. கடந்த 2010-2011 ஆண்டில் மட்டும் பனிரண்டாயிரத்து தொள்ளாயிரத்து ஒரு கோடியே நாற்பத்து ஏழு லட்சம் ரூபாய் மதிப்புள்ள கடல் மீன்கள் நம் நாட்டிலிருந்து ஏற்றுமதி செய்யப்பட்டுள்ளன (ஆதாரம் :Marine Product Exports Development Authority). 

   

ஆனால், விவசாயத்தை போன்றே இயற்கை சார்ந்த தொழிலாக இருப்பதால், மீன்பிடி தொழிலும் திடிரென ஏற்படும் பருவநிலை மாறுபாடுகளாலும, கடல் சீற்றங்களாலும் பாதிக்கப்படுகின்றது. இதனால் வலைகள் மற்றும் படகுகளுக்கு சேதங்கள் ஏற்படுவது ஒரு புறம் இருந்தாலும், சில சமயம் கடல் சீற்றங்களில் மீனவர்களின் உயிருக்கும் ஆபத்தாக முடிகிறது. இவ்வளவு வருமானத்தை நம் நாட்டிற்கு அள்ளி தரும் மீனவர்கள் கடலுக்கு செல்லும்போதும், திடிரென ஏற்படும் கடல் சீற்றங்களால் பாதிக்கப்படும்போதும், எதிர்பாராத விதமாக படகு பழுதாகும்போதும் பாதுகாப்பாக கரை திரும்ப சில அடிப்படை தொழிநுட்ப வசதிகளை பயன்படுத்தவதை பற்றி தெரிந்து கொள்ள வேண்டியுள்ளது.

அதில் முக்கியமான ஒன்று ஜிபிஸ் என்ற கருவியை வைத்து கொள்வதும் அதை முறையாக இயக்க கற்று கொள்வதுமாகும். இந்த கட்டுரையில் ஜிபிஸ் கருவியை பற்றிய சில அடிப்படை  தகவல்களையும், அதை மீனவர்கள் முறையாக பராமரித்து உபயோகிப்பது என்பதை பற்றியும் விளக்கி கூறுகின்றேன்.

ஜிபிஸ் கருவி ஒரு அறிமுகம்  

செல்போனுடன் ஜிபிஸ் கருவியை ஒப்பிட்டால், செல்போன் பேச பயன்படுவது போல் ஜிபிஸ் நாம் இருக்கும் இடத்தை தெரிந்து கொள்ள பயன்படிகிறது. தினசரி நாம் பயன்படுத்தும் செல்போனை விட சற்று பெரிய அளவில் இருக்கும் ஜிபிஸ் கருவியை உலகின் எந்த மூலையில் இருந்தும் நாம் இயக்கி பூமியில் நாம் எந்த இடத்தில் இருக்கின்றோம் என்பதை சில துல்லியமாக தெரிந்து கொள்ளவும், நாம் செல்ல வேண்டிய இடத்திற்கு சென்று சேரவும் முடியும். அதாவது, இதுவரை சென்னையையே பார்த்திராத ஒருவர், ஜிபிஸ் கருவியை இயக்க தெரிந்தால், திநகரில் உள்ள ஒரு சந்து கடையை யாரிடமும் விலாசம் விசாரிக்காமல் சென்று அடையமுடியும்.

ஜிபிஸ்  (GPS) என்ற சொல்லுக்கும் ஜிபிரஸ் (GPRS) என்ற சொல்லுக்கும் ஒரு  R என்ற எழுத்து மட்டுமே வேறுபட்டு இருப்பதால் இதை கொண்டு அடிக்கடி குழப்பி கொள்கின்றோம்.

இரண்டும் ஒன்றுக்கொன்று தொடர்பற்ற பணிகளை செய்யும் வெவ்வேறு தொழில் நுட்பங்களாகும். ஜிபிஸ் ஒரு கையடக்க புவியிடசுட்டு கருவியை குறிக்கின்றது. ஜிபிரஸ் என்பது செல்போன்களில் நாம் பயன்படுத்தும்  2G அலைவரிசையின் மூலமாக ஈமெயில், இன்டர்நெட் மற்றும் மல்டிமீடியா குறுஞ்செய்திகளை அனுப்ப பயன்படும் ஒரு தொழில் நுட்பமாகும். தற்போது ஜிபிஸ் தொழிநுட்பம் புகுத்தப்பட்ட செல்போன்கள் வந்துவிட்டன. ஆனால், ஒரு தனிப்பட்ட ஜிபிஸ் கருவிபோல செயற்கைகோளுடன் நேரடி தொடர்பு கொள்ளமால், இந்த வகை போன்கள் சிம்கார்டை சார்ந்து இயங்குகின்றன.

ஐவான் அலெக்சாண்டர் கெட்டிங் என்ற அமெரிக்க வல்லுனரால் ஜிபிஸ் கருவிக்கான அடிப்படை கோட்பாடுகள் உருவாக்கப்பட்டது.1970 களில் துவங்கி, அமெரிக்க  ராணுவ பயன்பாட்டிற்காக மட்டுமே உருவாக்கப்பட்ட ஜிபிஸ், பிற்காலத்தில் அதன் பல்வேறு நன்மைகளை கருதி பொது மக்கள் பயன்பாட்டிற்காக அனுமதிக்கப்பட்டது.  

பல ஆண்டுகளுக்கு முன்பு, ஜிபிஸ் கருவியை முதன்முதலில் பல்கலைகழக வகுப்பில் பார்க்கும் வாய்ப்பு எனக்கு கிடைத்தது. ஒரு செங்கல்லை போன்ற அளவும், எடையும் கொண்ட அந்த ஜிபிஸ் கருவி மிகவும் வியப்புக்குரிய விஷயமாக இருந்தது. ஆனால், தற்போது அதன் எடையும், அளவும், விலையும் பலமடங்கு சுருங்கி, ஒரு குறைந்த விலை டச் ஸ்க்ரீன் செல்போன் வாங்கும் விலைக்கே கிடைக்கின்றது.

    

ஜிபிஸ் என்பது Global Positioning System என்ற ஆங்கில வார்த்தையின் சுருக்கமாகும், இதன் அர்த்தம் “புவியிடகுறிப்பு கருவி அல்லது புவியிடசுட்டு கருவி” என சொல்லலாம்.  

நாம் செல்போன் பேச வேண்டுமானால் டவர் சிக்னல்  தேவைப்படுகிறது, நாம் பேசும் நேரத்திற்கு ஏற்ப பணம் கட்ட வேண்டியுள்ளது. ஆனால், ஜிபிஸ் கருவியை நீங்கள் பல நூறு கிலோமீட்டர் நடு கடலுக்கு சென்றாலும், ஏன் மனிதர்களே இல்லாத அண்டார்டிகா சென்றாலும் கூட இயக்க முடியும். இதில் முக்கியமான விசயம் என்னவென்றால், இந்த சேவையை பயன்படுத்த நீங்கள் யாருக்கும் பணம் செலுத்த தேவையில்லை.

இந்த அற்புத கையடக்க கருவி எப்படி செயல்படுகிறது  என்பதை பார்ப்போம். (குறிப்பு: உங்கள் நவீன செல்போனில் ஜிபிஸ் வசதி இருந்தால் அது உங்களுக்கு செல்போன் டவர் சிக்னல் இருந்தால் மட்டுமே இயங்கும், இதை நம்பி மீனவர்கள் கடலுக்கு  எடுத்து செல்லவேண்டாம்!)

ஜிபிஸ் கருவியின் இயக்கம் செயற்கை கோள்களை சார்ந்து உள்ளது. இந்த செயற்கைகோள்கள் அனைத்தும் அமெரிக்க இராணுவத்தால் ஏவப்பட்டு, இன்றும் கட்டுபடுத்தப்படுகின்றன. இருபத்து எட்டு  செயற்கைகோள்களை இந்த பணிக்காக அமெரிக்கா விண்ணில் பறக்கவிட்டுள்ளது. ஒவ்வொரு செயற்கைகோளும் சுமார் பதினோராயிரம் மைல்கள் உயரத்தில் பல்வேறு கோணங்களில் பூமியை சுற்றி வருகின்றன, எனவே, ஒரு பந்து வடிவ நூல் கண்டில் பல்வேறு கோணங்களில் நூல் சுற்றப்படுவது போல் அவை பல்வேறு கோண வட்டப்பாதைகளில் பறப்பதால், பூமியின் எந்த ஒரு இடத்தையும் ஒரு நாளைக்கு இரண்டு முறை கடந்து செல்கின்றன.  

இந்த ஒவ்வொரு செயற்கைகொளிலும் மிக துல்லியமான ஒரு அணுக்கடிகாரம் (Atomic Clock)பொருத்தப்பட்டுள்ளது. எனவே, ஒவ்வொரு ஜிபிஸ் செயற்கைகோளும் எந்த மணித்துளியில் பூமியின் எந்த இடத்திற்கு நேராக தான் பறந்து கொண்டு இருக்கின்றது என்ற தகவலை மின்காந்த அலைகளின் மூலம் இருபத்து நன்கு மணி நேரமும் பூமிக்கு அனுப்பி கொண்டே இருக்கின்றது. எனவே, கையடக்க ஜிபிஸ் கருவியை நீங்கள் உயிர்ப்பித்தவுடன், உங்கள் தலைக்கு மேலே எத்தனை ஜிபிஸ் செயற்கைகோள்கள் பறந்து கொண்டு இருக்கின்றனவோ அவற்றுடன் சில வினாடிகளில் தொடர்பு கொண்டு, அதை கருவியின் மின் திரையில் உங்களுக்கு காட்டும். மேலும், தொடர்பில் உள்ள செயற்கைகோள்கள் அனுப்பும் மின்கந்த அலை தகவல்களை கொண்டும், அந்த தகவல்கள் உங்கள் ஜிபிஸ் கருவியை வந்தடைய ஆகும் காலத்தையும் கணக்கிட்டு, பூமியில் எந்த இடத்தில் ஜிபிஸ் கருவியை பிடித்துகொண்டு நீங்கள் நின்று கொண்டு இருக்கின்றீர்கள் என்பதை துல்லியமாக உங்களுக்கு தெரிவிக்கின்றது. இதன் மூலம், உலகில் நீங்கள் எந்த இடத்தில் நின்று கொண்டு இருக்கின்றீர்கள் என்பதை ஏறக்குறைய வெறும் பத்து மீட்டர் துல்லியத்தில் நீங்கள் அறிந்து கொள்ளலாம்.    

இதில் கவனிக்கதக்க விஷயம் ஒன்று உள்ளது. மெரினா பீச்சில் உள்ள காந்தி சிலை அருகே நின்று கொண்டு ஜிபிஸ் கருவியை இயக்கினாலும், பசிபிக் கடலின் ஏதோ ஒரு தீவில் இருந்து ஜிபிஸ் கருவியை இயக்கினாலும் அந்த இடத்தின் பெயரை ஜிபிஸ் கருவி உங்களுக்கு சொல்வதில்லை. மாறாக ஒரு சங்கேத எண்களை மட்டுமே சொல்கிறது. அதற்குள் ஒளிந்திருக்கும் ரகசியத்தை தெரிந்து கொள்வோமா!

இதற்கான ரகசியத்தை புரிந்து கொள்ள, பள்ளியில் கற்றுகொண்ட புவியியல் பாடங்களை நினைவு கூர்வோம். பூமியானது புவி நடுக்கொட்டின் மூலமாக கிடைமட்டமாகவும், கிரீன்விச் தீர்க்கரேகை மூலமாக செங்குத்தாகவும் இரண்டாக பிரிக்கப்பட்டுள்ளது.

இந்த கிடைமட்ட கோடுகளுக்கு அட்ச ரேகைகள் (Latitude) என்றும் செங்குத்து கோடுகளுக்கு தீர்க்க ரேகைகள் (Longitude) என்றும் பெயர்.  ஒரு கோளத்திற்கு முன்னூற்று அறுபது கோணங்கள் இருப்பதால்,  கோள வடிவ பூமியை சுற்றி ஒரு கோணத்திற்கு ஒன்றாக முன்னுற்று அறுபது கிடைமட்ட மற்றும் செங்குத்து கோடுகளாக பிரிக்கப்பட்டுள்ளன.  

எனவே, புவிமைய கோட்டிலிருந்து துவங்கி நீங்கள் வடக்கு நோக்கி பயணித்தால், முன்னுற்று அறுபது கிடைமட்ட அட்ச ரேகைகளை கடந்து பூமியை முழுவதுமாக சுற்றி (40,008 கி.மி) மீண்டும் புறப்பட்ட இடத்திற்கே தெற்கிலிருந்து வந்து சேர்வீர்கள். அதுபோல, இங்கிலாந்தில் உள்ள  கிரீன்விச் என்ற இடத்திலிருந்து துவங்கும்  மைய தீர்க்க ரேகையிலிருந்து நீங்கள் கிழக்கு நோக்கி பயணித்தால் முன்னுற்று அறுபது செங்குத்து தீர்க்க ரேகைகளை கடக்கும்போது பூமியை முழுவதுமாக சுற்றி (40,075 கிமி) மீண்டும் புறப்பட்ட இடத்திற்கே மேற்கிலிருந்து வந்து சேர்ந்து இருப்பீர்கள். (இதில் சுவாரஸ்யமான விஷயம் என்னவென்றால், பூமியின் துருவபகுதிகள் சற்றே தட்டையாக இருப்பதால் கிழக்கு மேற்காக பூமியை சுற்றுவதை விட, வடக்கு தெற்காக பூமியை சுற்றி வந்தால் அறுபத்து ஏழு கிலோமீட்டர்கள் குறைவாக இருக்கும்).   

ஆனால், பூமியின் மொத்த சுற்றளவு சுமார் நாற்பது ஆயிரம் கிலோமீட்டர் இருக்கும்போது, வெறும் முன்னுற்று அறுபது கிடைமட்ட மற்றும் செங்குத்து கோடுகளால் பிரிப்பதால் ஒவ்வொரு கோட்டுக்கும் இடையே சுமார் நூற்று பதினோரு கிலோமீட்டர்கள் இடைவெளி உள்ளது.  இந்த இடைவெளியில் எங்கோ ஒரு புள்ளியில் நீங்கள் நிற்கும்போது அதையும் ஜிபிஸ் துல்லியமாக உங்களுக்கு தெரிவிக்க வேண்டும் இல்லையா? அது எப்படி என்று பார்ப்போம்.

அதற்காக, ஒவ்வொரு கிடைமட்ட அல்லது செங்குத்து கோடும் நூற்று பதினோரு (111 km) கிலோமீட்டர் தொலைவு கொண்ட ஒரு டிகிரியாக கணக்கிடப்படுகிறது.   ஒரு டிகிரிக்குள் உள்ள தொலைவு அறுபது நிமிடங்களாக பிரிக்கப்பட்டுள்ளது. ஒரு நிமிடம் என்பது 1.85  கிமி தொலைவு ஆகும். ஒவ்வொரு நிமிடமும் அறுபது நொடிகளாக பிரிக்கப்பட்டுள்ளது, இதில் ஒரு நொடி என்பது 30 மீட்டர் தொலைவு ஆகும்.   

   

உதாரணமாக, புதுச்சேரி கடற்கரையில் உள்ள காந்தி சிலையருகே நின்று கொண்டு ஜிபிஸ் கருவியை இயக்கினால் அது கீழ்கண்ட எண்களை இரண்டு வரிசையாக காட்டும். (நன்றி கூகிள் எர்த்).

11°55'56.95"N

79°50'9.58"E

மேற்கண்ட எண்களில் முதல் வரிசையானது கிடைமட்ட (அட்சரேகை) கோட்டையும், இரண்டாவது வரிசையானது செங்குத்து (தீர்க்க ரேகை) கோட்டையும் குறிக்கின்றன. முதல் வரிசையில் உள்ளபடி நீங்கள் புவி நடுக்கோட்டிலிருந்து 11 வது டிகிரியில், 55வது நிமிடத்தில், 56.95 வது நொடியில் நின்று கொண்டு இருக்கின்றீர்கள். கடைசியில் உள்ள N, புவி நடுக்கொட்டின் வடக்குப்புறமாக நீங்கள் இருப்பதை குறிக்கின்றது. இதற்கு முந்தைய பத்தியில் விளக்கியுள்ளபடி கணக்கிட்டால், புவி நடுக்கோட்டிலிருந்து 1324.5 கிமி வடக்கில்  நீங்கள் நின்று கொண்டு இருப்பதை தெரிந்து கொள்ளலாம்.   

அதே போல, இரண்டாவது வரிசியில் உள்ளபடி நீங்கள் கிரீன்விச் தீர்க்க ரேகையிலிருந்து 79 வது டிகிரியில், 50 வது நிமிடத்தில், 9.58 நொடிகளில் நின்று இருக்கின்றீர்கள். இதில் கடைசியில் உள்ள  என்ற எழுத்து, நீங்கள் செங்குத்து மைய கோடான  கிரீன்வீச்  தீர்க்க ரேகையின் கிழக்கு புறமாக நின்று கொண்டு இருப்பதை குறிக்கின்றது.

உலகில் உள்ள எல்லோருக்கும், எல்லா இடங்களின் பெயர்களும் தெரியாது என்பதாலும், நடுக்கடலில் விலாசம் விசாரிக்க டீக்கடைகள் இல்லாததாலும், இந்த கோடுகளை பயன்படுத்தி கடலில் ஒரு படகு எத்தனையாவது கிடைமட்ட  மற்றும் செங்குத்து கோடுகள் சந்திக்கும் புள்ளியில் பழுதடைந்து நின்று கொண்டு இருக்கிறது என்பதை ஜிபிஸ் கருவி கொண்டு அறிந்து மீட்பு பணிகளை துரிதமாக செயல்படுத்தலாம். மேலும், இன்றைய நவீன விமான சேவையில் ஜிபிஸ் தொழிநுட்பம் முக்கிய பங்கு வகிக்கின்றது. 

     தமிழக மீனவர்கள் ஜிபிஸ் கருவியை பயன்படுத்துவது எப்படி?

தஞ்சை, புதுக்கோட்டை மற்றும் இராமநாதபுரம் மவட்டத்தை சேர்ந்த மீனவர்கள் ஜிபிஸ் கருவி பரவலாக பயன்படுத்துகின்றனர். இந்த கருவியை கொண்டு, கடலில் ஒரு இடத்தில் வலையை போட்டவுடன் அதன் பாயிண்டை (ஒரு பட்டனை அழுத்தியதும் அந்த இடத்தின் தீர்க்க ரேகை மற்றும் அட்ச ரேகை புள்ளிகளை தானாக அந்த கருவி பதிவு செய்யும்) குறித்து கொள்கின்றனர்.

மீண்டும் மறுநாள் அதே இடத்திற்கு சென்று வலை எடுக்க மற்றொரு பட்டனை அழுத்தியதும் ஜிபிஸ் கருவி வலை போட்ட இடத்தை நோக்கி வழிகாட்டும். தற்போதுள்ள ஜிபிஸ் கருவிகள், ஒரு பட்டனை அமுக்கியவுடன், மற்ற எல்லாவற்றையும் பார்த்து கொள்வதால் பயன்படுத்த எளிமையாக உள்ளது.   

பல ஆயிரம் ருபாய் மதிப்புள்ள வலையை ஆழ்கடலில் மீண்டும் கண்டுபிடிக்க உதவும் இந்த கருவியை மேலும் எவ்வாறு செம்மையாக பயன்படுத்தலாம் என்பதை பார்ப்போம்.

கடலுக்கு செல்லும் மீனவர்கள் ஜிபிஸ் கருவியை பராமரிக்கும் முறைகள்:

மீனவர்கள் ஜிபிஸ் கருவியை மேலும் செம்மையாக பயன்படுத்துவதற்கான சில குறிப்புகளை இங்கு தருகிறேன். ஜிபிஸ் கருவி நேரடியாக செயற்கைகோளுடன் தொடர்பு கொண்டு செயல்படுவதால், செல்போன்களை விட மின்காந்த அலைகள் அதிகமாக இருக்கும். எனவே, பேட்டரிகள் வேகமாக தீர்ந்து விடும். எனவே, மீனவர்கள் தங்களுக்கு தேவையில்லாத பட்சத்தில் ஜிபிஸ் கருவியை “சுவிட்ச் ஆப்” செய்து வைக்கவும். இதன்மூலம் நீண்ட நேரம் பேட்டரி பயன்படுவதோடு, உங்கள் உடல் நலத்திற்கும் நல்லது. சிலர், ஜிபிஸ் கருவியில் பேட்டரி தீர்ந்தவுடன், படகு இஞ்சினில் வைத்து சூடு படுத்தி விட்டு மீண்டும் பயன்படுத்துவதாக கேள்விபட்டு இருக்கின்றேன். இவ்வாறு செய்வதால் பேட்டரியில் உள்ள அமிலம் ஜிபிஸ் கருவிக்குள் இறங்கி கருவி பழுதடையும் வாய்ப்பு உள்ளது. எனவே, சில ஆயிரம் ருபாய் செலவு செய்து ஜிபிஸ் கருவியை வாங்கும்போது, அத்துடன்  சில ரூபாய்கள் கொடுத்து இரண்டு எக்ஸ்ட்ரா பேட்டரிகளும்  வாங்கினால், கடலில் இருக்கும்போது உங்களுக்கும் உங்கள் ஜிபிஸ் கருவிக்கும் பாதுகாப்பாக அமையும் என்பதில் ஐயமில்லை.

ஜிபிஸ் கருவியை ஒரு சிறிய பிளாஸ்டிக் பெட்டியில், எப்போதும் இரண்டு எக்ஸ்ட்ரா பேட்டரிகளுடன் எடுத்து செல்லுங்கள். மீன்பிடிக்க கிளம்பும்போது, கருவி நன்றாக இயங்குகிறதா என்பதையும், கருவியில் உள்ள பேட்டரிகள் சார்ஜ் இருக்கின்றதா என்பதையும் பரிசோதித்து கொள்ளுங்கள்.

ஜிபிஸ் கருவியின் மேல்புறத்தில் உள்ள உட்பொதிந்த ஆண்டேன்னா நேரடியாக செயற்கைகோளுடன் தொடர்பு கொள்ள வேண்டும். எனவே, ஜிபிஸ் கருவியை செங்குத்தாக பிடித்து கொண்டு பயன்படுத்தவும். மேலும், இவ்வாறு செய்வதால் கருவியின் மின்னணு திரை நேரடியாக கடலில் அடிக்கும் கடுமையான வெயிலில் படமால் பாதுகாக்க முடியும்.

கடலுக்கு செல்லும் மீனவர்கள் ஜிபிஸ் கருவியை பயன்படுத்தும் முறைகள்

நீங்கள் புதிதாக ஒரு ஜிபிஸ் கருவி வாங்கியவுடன், ஏற்கனவே ஜிபிஸ் கருவி வைத்துள்ள உங்கள் நண்பரையும் அழைத்து சென்று வலை போட்ட இடத்தினை இரண்டு கருவிகள் மூலமாக பதிந்து கொள்ளுங்கள். மீண்டும் வலை போட்ட இடத்திற்கு செல்லும்போது, இரண்டு கருவிகளையும் பயன்படுத்தி அந்த இடத்திற்கு செல்லுங்கள். இதன்மூலம், உங்கள் கருவி சரியாக செயல்படுகிறதா என்பதையும், நீங்கள் சரியாக கருவியை இயக்க கொண்டீர்களா என்பதையும் தெரிந்து முடியும். அதுமட்டுமல்லாமல், முதல் முறையாக ஜிபிஸ் கருவியை பயன்படுத்தும்போது ஏற்படும் சிறு பிழைகளால் வலை போட்ட இடத்தின் பாயிண்ட் பதியாமல் போனால், நீங்கள் உழைத்து உருவாக்கிய பல ஆயிரம் மதிப்புள்ள வலைகள் காணாமல் போவதையும் தடுக்கலாம். 

உங்கள் ஊர் படகுத்துறையின் ஜிபிஸ் எண்ணை நிரந்தரமாக ஜிபிஸ் கருவியில் பதிந்து கொள்ளுங்கள், இதன் மூலம் உங்கள் ஊரிலிருந்து கடலுக்குள் மீன்பிடிக்க எவ்வளவு தொலைவு சென்று இருக்கின்றீர்கள் என்பதை அவ்வபோது பார்த்துக்கொள்ளலாம். ஒருவேளை படகு பழுதாகும்போதோ அல்லது கடல் சீற்றத்தினால் திசை மாறும்போதோ மீண்டும் துல்லியமாக கரைக்கு வர இதுவும் உதவியாக இருக்கும்.

உதாரணமாக, உங்கள் படகு நடுக்கடலில் பழுதாகி நிற்பதாக வைத்துகொள்வோம். அப்போது கடலோர காவல் படையையோ அல்லது உங்கள் நண்பர்களையோ செல்போனில் அழைத்து உங்களை மீட்டு செல்லுமாறு அவசர அழைப்பு விடுக்கின்றீர்கள். உங்களை நோக்கி அவர்கள் விரைவாக, துல்லியமாக வந்து சேர ஜிபிஸ் கருவியை நிச்சயமாக நீங்கள் பயன்படுத்தலாம்.

அது எவ்வாறு என்பதை இப்போது பார்ப்போம். மீனவர்கள் பொது வாக ஒரு வலைபோட்ட இடத்தின் பாயிண்டை ஜிபிஸ்ஸில் குறித்தவுடன் அதை அதன் மெமாரியில் சேமித்து மீண்டும் அதை எடுத்து பயன்படுத்துவார்கள்.  அதாவது, செல்போனில் உங்கள் நண்பரின் செல்போன் எண்ணை  சேமித்து மீண்டும் அவருக்கு அழைப்பு விடுப்பது போல ஆகும். ஆனால், அந்த குறிப்பிட்ட பாயிண்டை சேமிக்கும்போது அதன் அட்ச மற்றும் தீர்க்க ரேகையை குறிக்கும் எண்களை பொதுவாக கவனிப்பதில்லை. உதாரணமாக, உங்கள் செல்போனில் உங்கள் நண்பரின் பெயரை “ராஜ்குமார்” என்றோ அல்லது சுருக்கமாக “ராஜா” என்றோ, எப்படி குறிப்பிட்டு இருந்தாலும், அவரின் செல்போன் எண் ஒன்றுதான் இல்லையா? அதுபோலவே, ஒரு இடத்தின் ஜிபிஸ் பாயிண்டை பதியும்போது நீங்கள் அந்த பாயிண்டை, எந்த எண் அல்லது பெயர் அல்லது குறியீடு வைத்து சேமித்தாலும், அதன் அட்ச மற்றும் தீர்க்க ரேகை புள்ளிகள் எல்லா ஜிபிஸ் கருவிகளிலும் ஒரே இடத்தை நோக்கித்தான் காட்டும்.    

இதன் அடிப்படையில், கடலில் உங்கள் படகு பழுதாகி இருக்கும்போது அவசர அழைப்பை விடுக்கும்முன்னர், ஜிபிஸ் கருவியை இயக்கி அந்த இடத்தின் பாயிண்டை குறித்து கொள்ளுங்கள். மேலும், அந்த பாயிண்டை குறிக்கும்போது, அதே பக்கத்தில் கீழ்பகுதியில் தெரியும் அட்ச மற்றும் தீர்க்க ரேகை எண்களை குறித்து கொள்ளுங்கள். உதாரணமாக அட்ச மற்றும் தீர்க்க ரேகை புள்ளிகள் கீழ்கண்ட அமைப்பில் இருக்கும்.

உதாரணத்திற்கு (குறிப்பு: இது உதாரணம் மட்டுமே)

அட்ச ரேகை 10°16'56.76"N

தீர்க்க ரேகை 79°30'45.05"E

நீங்கள் கடலில் எந்த இடத்தில் இருக்கின்றீர்கள், என்பதை பொருத்து மேற்கண்ட உதாரணத்தில் இருப்பதை போன்ற அமைப்பில், எண்கள் மாறும்.  அந்த  எண்களை  sms மூலமாகவோ அல்லது போன் அழைப்பு மூலமாகவோ உங்களை காப்பற்ற வருபவருக்கு தெரிவிக்கலாம். மேலும், மீட்புக்குழுவை சேர்ந்தவர்கள், தங்களுடைய ஜிபிஸ் கருவியில் அந்த எண்களை பதிவு செய்து கொண்டவுடன், கடலில் எந்த திசையில், எவ்வளவு தூரத்தில் மீட்க பட வேண்டிய படகு தத்தளித்து கொண்டு இருக்கின்றது என்பதை அறிந்து, அதற்கேற்றவாறு எரிபொருளும், ஆட்களும் மீட்பு கருவிகளும் எடுத்துகொண்டு செல்ல முடியும். எனவே, ஜிபிஸ் கருவியை பற்றி கடலில் மாட்டி கொண்டவரும் அவரை காப்பாற்ற வருபவரும் நன்கு தெரிந்து வைத்திருக்கும்பட்சத்தில், மிக எளிமையாகவும், உடனடியாகவும் மீட்பு நடவடிக்கை அமையும். எனவே, பாதுகாப்பான கடல் பயணத்திற்கு ஜிபிஸ் ஒரு சிறந்த நண்பன் என்பதில் எவ்வித ஐயமுமில்லை.  

   

Balaji Vedharjan's - 1200 km Bike Expedition (2002) & 600 km Sea Kayak Expedition (2007) for Marine Conservation Awareness

Balaji Vedharajan - 1200 km Bike Expedition (2002)

Balaji Vedharajan - 600 km Sea Kayak Expedition (2007)

படம் சொல்லும் செய்தி

கடந்த சில வருடங்களாக எங்கள் குழுவால் வளர்க்கபட்டு வரும் கடலோர காடுகளை படத்தை கீழ்கண்ட படத்தை சொடுக்குவதன் மூலம் காணலாம்.  அறிவியல் பின்பலத்துடன் கூடிய செயல்பாட்டு முறையை, இங்குள்ள மக்களின் பாரம்பரிய, இயற்கை சார்ந்த அறிவுடன் இணைந்து இந்த காடு வளர்ப்பு திட்டம் செயல்படுத்தபட்டது.  கடலோரங்களில் மட்டும் வளரும் இந்த மேங்ரோவ் காடுகள், கடல் அரிப்பை தடுக்கவும், இயற்கை பேரிடர்களிலிருந்து காக்கவும் பயன்படுகிறது.  

சாதாரண மரங்கள் வளர தகுதியில்லாத உப்பு தன்மை வாய்ந்த இடங்களில் இவ்வகை மரங்கள் செழித்து வளர்கின்றன.  இவற்றை வளர்ப்பதற்கு நாம் எடுக்கும் மிக நீண்ட கால அளவை கொண்டு இருப்பதாலும், கடினமான ஒருங்கிணைக்கப்பட்ட தொடர் முயற்சி தேவைப்படுவதாலும்,  தற்போதுள்ள காடுகளை பாதுகாப்பதே, இது போன்று காடுகளை வளர்ப்பதை காட்டிலும் எளிமையான உத்தியாகும்.  

இந்த படத்தில் உள்ள காடுகளை வளர்ப்பதற்கு முன் இருந்ததை விட தற்போது அதிக எண்ணிக்கையில் இங்கு நண்டுகள் கிடைப்பதாக இப்பகுதி மீனவர்கள் சொல்கிறார்கள். இதற்கு இந்த காட்டில் இருந்து மக்கி விழும் இலைகளின் உட்டச்சத்து நிறைந்த மண் ஒரு காரணமாக இருக்கலாம், அல்லது நண்டுகள் தங்கள் குடும்பத்துடன் ஒரு புதிய இடம் தேடுகையில் ஒரு தோதான, மறைவான, ஈரப்பதமுள்ள இந்த இடத்தில் வந்து குடியமர்ந்து இருக்கலாம்.   சர்வேதச மார்க்கெட்டில் நல்ல விலை போக கூடிய சம்பா நண்டுகள், இந்த கடலோர காடுகள் உள்ள இடங்களில் தான் பிடிக்கப்படுகின்றன என்பது குரிப்பிடதக்க விஷயமாகும்.  தஞ்சை மற்றும் திருவாரூர் மாவட்டத்தில் பிடிக்கப்படும் சம்பா நண்டுகள் சிங்கப்பூர் போன்ற இடங்களில் உள்ள உயர்தர உணவு விடுதிகளில் பரிமாறப்படுகின்றன. 

கடந்த ஆண்டு சிங்கப்பூர் சென்று இருந்தபோது ஒரு சீன உணவு விடுதியை கடந்து செல்ல நேரிட்டது, அங்கு ஒரு தொட்டியில் உயிருடன் பார்த்த Mr. சம்பா நண்டு, நம் ஊரை சேர்ந்தவராக இருப்பாரோ என்று தோன்றியது.  மனிதர்களிடையே மட்டும்தான் எங்கயோ பார்த்த ஞாபகம் இருக்க வேண்டுமா என்ன?

Click this image to see the slide show of mangrove growth

Trapnet Fishery in Palk Bay (பாக் நீரிணைப்பில் அடைப்பு வலை மீன்பிடிமுறை)

அடைப்பு வலையின் மர ஊன்று கால்களில் ஒன்றை, கடலுக்கு அடியில் நிலை நிறுத்தும் பணியில் ஈடுபட்டுள்ள மீனவர்.

அடைப்பு வலைக்குள் மாட்டிகொண்ட மீன்களை பிடிக்கும் முறைகள்.

வலைக்குள் இறங்கி கையினால் பிடித்த கடல் கெழுத்தி மீன் 

மேற்கண்ட படம், கடல் சூழல் மண்டலங்களை பாதுக்காக்க வேண்டியதன் முக்கியத்துவத்தை உணர்த்துவதாக உள்ளது. இந்த அடைப்பு வலை மீனவரின் வலைகளை உற்று நோக்கினால், கடல் தாழைகள் (seagrass) சிக்கி உள்ளதை காணலாம். இதன் மூலம் இப்பகுதியில் நிறைய கடல் தாழைகள் உள்ளன என்பதை அறிய முடிகிறது.  இவை மீன்கள் முட்டையிட்டு குஞ்சு பொரிக்கும் மருத்துவமனைகளாக விளங்குகின்றன.  எனவே, கடலில் மீன்பிடி தொழில் சிறப்பாக இருக்க இந்த கடல் தாழைகள் அவசியமாகும்.  மேலும், இந்த படத்தை இன்னும் சற்று உற்று நோக்கினால், தொலைதூரத்தில் மங்க்ரோவ் (mangroves) காடுகள் இருப்பதை காணலாம். இந்த கடலோர காடுகளில் இருந்து வரும் மக்கிய சத்து பொருட்கள், கடல் தாழைகளின் வளர்ச்சியில் முக்கிய பங்கு வகிக்கின்றன.  மேலும், கடல் தாழைகளில் உற்பத்தியாகும் கடல் இறால்கள், மீன்கள் மற்றும் நண்டுகள் அந்த காடுகளின் வேர்ப்பகுதிகளுக்கு சென்று உணவு தேடுவதால், கடல் கரையோரம் மீன்பிடி தொழில் செய்யும் சிறு மற்றும் ஏழை மீனவர்களின் வாழ்வை ஆதாரமாக்கும் அர்த்தமுள்ள பணியை இந்த கரையோர காடுகளும், கடல் தாழைகளும் சத்தமின்றி செய்து வருகின்றன. 

Salt Marsh in Muthupet

I found this beautiful salt marsh for the first time.  Its scientific name is  Heliotropium curussavicum

A branch of E.agallocha (Thillai maram), which is one of the mangrove species. The branch I observed had a steep cut in the dense forest area, which might be due to insect(s)!.

Board Walk in Sethukuda of Muthupet Mangroves.  This board walk is damaged now.  As it was established adjacent to a restoration canal, now the grown up mangroves extend the roots over the board walk.

Red clay spots are found in Muthupet

Beautiful ornamentation in E.agallocha bark

Fishers in Koraiyar creek of Muthupet.  We lost our traditional fishing vessels (thoni), replaced by fibre boats.  It reduces the physical work of fishers.  So, fishers no need to paddle the traditional wooden boats or sail. 

A mangrove fisher in Muthupet.  He uses the car tube for floating as well as moving on the muddy floor.  Traditionally, they have to walk about 8km  per day  with pot full of fishes on the head.  Might be good stamina and strong muscles to walk in the muddy river banks in the past.  

Now, they use fibre boats - a more comfortable and quick transport between the market and fishing grounds.  However, it might reduces their physical strength. 

An egret is waiting patiently behind a mangrove tree in Sethukuda of Muthupet on 3rd March 2012. 

Changing mangroves in Palk Bay!..(என்னாச்சு இந்த காடுகளுக்கு?)

முத்துபேட்டையில் உள்ள லகூன் என்று அழைக்கப்படும் கடலோர ஏரியை சுற்றி உள்ள மேங்ரோவ் காடுகளின் வளர்ச்சியை செயற்கை கோள் புகைப்படங்களை கொண்டு ஆய்வு செய்தேன்.

இந்த ஆய்வின் படி, கடந்த 2003 ஆம் வருடத்தில் எடுக்கப்பட்ட செயற்கை கொள் புகைப்படத்துடன், 2011 வருடத்தில் எடுக்கப்பட்ட புகைப்படத்தை ஒப்பிட்டு பார்த்தேன்.  

இந்த கடலோர ஏரியின் (லகூன்) வடகிழக்கு, தெற்கு, வடமேற்கு போன்ற இடங்களில் உள்ள காடுகளின் பரப்பளவை துல்லியமாக கணக்கிட்டு, பின்பு அதே பகுதிகளின் தற்போதிய காடுகள் உள்ள சூழலையும் ஒப்பிட்டு பார்த்தேன்.

இந்த செயல்களை செய்வதற்கு சில தொழிநுட்ப (GIS) ரீதியிலான திறனும், காடுகளின் வகைகளை செயற்கைக்கோள் புகைப்படங்களில் உள்ள நிற வேற்றுமையை கொண்டு வேறு படுத்தி பார்க்கும் ஆய்வக - கள பயிற்சியும் தேவையாகும்.  

பல்வேறு இலவச மென் பொருட்களை கொண்டும் சில அடிப்படை ஆய்வுகளை செய்யலாம்.  இப்போது மீண்டும் விஷயத்திற்கு வருவோம்.

இந்த ஆய்வின்படி, முத்துபேட்டை லகூனில் உள்ள வட கிழக்கு மூலையில் (கிளைதாங்கி மற்றும் மரைக்கா கோரையாறு பகுதிகள்) காடுகளின் பரப்பு, கடந்த 2003 ஆம் வருடத்திலிருந்து 2011 ஆம் வருடத்திற்குட்பட்ட எட்டு வருடங்களில் 26.7 ஹெக்டர் அளவிற்கு அதிகரித்துள்ளது (படம் மேலே உள்ளது). 

தற்போதைய உலக சூழலில், இருக்கும் காடுகளை காப்பதே பெரும்பாடாக இருக்கும் நிலையில், இயற்கையாகவே இந்த பகுதியில் உள்ள மங்க்ரோவ் காடுகள் அதிகரித்து உள்ளது நல்ல விஷயமாகும்.

அதே சமயம், காடுகளின் பரப்பு, லகூனை நோக்கி விரிவுபட்டு இருப்பதால், வருங்காலத்தில் இந்த லகூன் சுருங்கி விடும் வாய்ப்பு உள்ளது.  நீர்பிடிப்பு பகுதிகளில் மரங்கள் வெட்டப்படுவதும், ஆறுகளில் மணல் அள்ளப்படுவதும் அதிகரித்து உள்ளதால் அங்கு உள்ள நுண்ணிய மண் பொருட்கள் (களி) அதிகமாக அடித்து வரப்பட்டு, அதன் காரணமாக லகூன் நீர்பிடிப்பு பகுதியின் ஆழம் குறைந்து, அந்த சேற்று பகுதியில் காடுகள் வேகமாக விரிவுபட்டு இருக்கலாம் என்றும் கணிக்க முடிகிறது.  லகூனின் நீர்பிடிப்பு பகுதியின் பரப்பு குறையும்போது அதை சார்ந்த சிறு, குறு, எளிய மீனவர்களின் மீன்பிடி தொழிலும் பாதிக்கப்படக்கூடிய சூழல் ஏற்படலாம்.   இந்த கூற்றை மெய்பிக்கவோ அல்லது பொய்பிக்கவோ வேண்டுமெனில் மேலும் கள ஆய்வு செய்ய வேண்டியுள்ளது.. 

அதே போலவே, லகூனின் வட கிழக்கு மூலையிலும், முகத்துவார பகுதியிலும் காடுகள் சீராக அதிகரித்து உள்ளன.  

Feeling Alive in Wild - 1st March 2012

in dense setthukuda forest area, the relationship between tree size and its space between each other is perfectly organized by nature.  For example, when they are young, thousands of seedlings grow together, later the stronger and fast growing seedling dominate the space.    

 Data sheets, mud, mosquitoes and mangroves... 

 This canal is blocked by the planted Rhizophora mucronata (a species in mangroves). However the roots offer a perfect shade for young fishes.

 Mud matters for mangroves

 measuring height of a mangrove R.mucronata

The beautiful mermaid - her sad end in our coast

It is sad that we have lost another beautiful sea cow (Dugong) from our coast. Yes, this huge female dugong washed ashore on the first week of june 2011. The body scars showed that it might have an accident with fisher boats.

Let us pray for this beautiful, innocent soul.

அற்புத கடல் நீரோட்டங்களில் சில அனுபவங்கள்

உலக கடல் பரப்பை பெருங்கடல்களாகவும் (ocean), கடல்களாகவும் (sea) பிரிக்கலாம். இதில் பெருங்கடல்களின் ஒரு சிறு பகுதியே கடல்கள் ஆகும். உதாரணத்திற்கு இந்திய பெருங்கடலின் ஒருசிறு பகுதியே வங்காள விரிகுடா கடல் ஆகும். இப்படி பல பெயர்களால் நாம் பிரித்து வைத்தாலும், மற்ற எல்லா பெருங்கடல்களும் ஒன்றுடன் ஒன்று இணைக்கப்பட்டே உள்ளன

எனவே, நீங்கள் கன்னியாகுமரியிலிருந்து நேராக தெற்கு நோக்கி சுமார் 8,000 கிலோமீட்டர் ஒரு படகில் பயணித்தால், எந்த தடையுமின்றி பெங்குயின் பறவைகள் வாழும் பனி படர்ந்த அண்டார்டிகாவில் சென்று கரை ஏறலாம். இந்த தூரம் நமக்கு மலைப்பாக இருந்தாலும், கடல் ஆமைகளும், திமிங்கலங்களும் கம்பன் எக்ஸ்பிரசில் சென்னையிலிருந்து ஊருக்கு விடுமுறைக்கு வருவதை போல பல இடங்களுக்கு சர்வ சாதாரணமாக பயணிக்கின்றன. இதில் ஒரு சின்ன வித்தியாசம், இந்த கடல் விலங்குகள் கம்பனுக்கு பதில் கடல் நீரோட்டத்தில் பயணிக்கின்றன.

கடல் நீரோட்டங்கள் வலிமையானவை. அவற்றின் நீளமும், அகலமும், உலகில் ஓடும் எந்த ஒரு ஆற்றின் அளவையும் விட மிக பெரியதாகும். மழைக்காலங்களில் நம் ஊர் ஆற்றில் ஓடும் நீரின் வேகத்தையும், வளைந்து நெளிந்து செல்லும் அதன் இயல்பையும் நாம் நன்றாக பார்க்கமுடியும். ஆனால், பூமியின் 29% மேற்பரப்பை மட்டுமே மூடியுள்ள நிலத்தில் வாழும் நாம், பூமியின் 71% மேற்பரப்பை நீலவண்ண நீர்போர்வையாக போர்த்தியுள்ள க்டலில் ஓடிக்கொண்டு இருக்கும் பிரம்மாண்டமான கடல் நீரோட்டங்களை நம்மால் கரையிலிருந்து பார்க்கும் போது தெரிந்து கொள்ள வாய்ப்பு இருப்பதில்லை.

கடலின் ஒவ்வொரு துளி நீரும் காற்றினால் தள்ளப்படுவதாலும், உப்பு தன்மை மற்றும் வெப்பநிலை மாறுபாட்டாலும், சூரியன் மற்றும் சந்திரனுக்கு இடையே ஏற்படும் ஈர்ப்பு விசை மாறுபாட்டாலும் தொடர்ந்து நகர்ந்து கொண்டே இருக்கின்றது. எனவே, சென்னை மெரினா கடற்கரையில் உங்கள் கால்களை நனைத்து செல்லும் கடல் நீர் இதற்கு முன்பு அண்டார்டிகாவிலோ பசுபிக் பெருங்கடலிலோ இருந்திருக்கலாம். அதாவது, உடலின் எல்லா பகுதிகளுக்கும் இரத்தம் பாய்வதை போல கடல் நீரோட்டங்கள் கடலின் உயிரோட்டமாய் உலகெங்கிலும் ஓடுகின்றன. இந்த வேலிய்ற்ற மாபெரும் கடற்பரப்பில், ஆர்க்டிக் முதல் அன்டார்டிக் வரையிலும், இந்திய பெருங்கடல் முதல் பசிபிக் பெருங்கடல் வரையிலும் கடல் நீரோட்டங்கள் ஒரு கன்வேயர் பெல்ட் போல தொடர்ந்து ஓடி கொண்டே இருக்கின்றன. இந்த கடல் கன்வேயர் பெல்டில் மீன்களும், நண்டுகளும், ஆமைகளும், திமிங்கலங்களும் சுறாக்களும் இலவசமாக பயணித்து இனப்பெருக்கம் செய்ய பல்வேறு இடங்களுக்கு செல்கின்றன. இதன் காரணமாகவே, குறிப்பிட்ட கடல் நீரோட்டங்கள் பாயும் குறிப்பிட்ட சீசனில் மட்டும் அதிக அளவில் மீன்கள் கிடைக்கின்றன. உதாரணமாக, வடகிழக்கு பருவக்காற்று எனப்படும் வாடைக்காற்று வீசும் மாதங்களில், வடக்கிலிருந்து தமிழகத்தின் கரையோரமாக வன்னி வெள்ளம என்ற நீரோட்டம் வலிமையுடன் ஓடுகிறது. வாடை காற்றினால் தள்ளப்படும் இந்த வன்னி வெள்ளம் பலவிதமான மீன்களையும், நண்டுகளையும், இறால்களையும் அள்ளி கொண்டு வந்து கோடியக்கரை பகுதியில் குவிப்பதால் (டிசம்பர் முதல் பிப்ரவரி வரை) பலகோடி ரூபாய் மதிப்பிலான மீன்பிடித்தொழில் இங்கு நடைபெறுகிறது. எனவே, தமிழகத்தின் பல பகுதிகளிலிருந்தும் மீனவர்கள் இந்த சீசனில் இங்கு வந்து தங்கி மீன்பிடித்து செல்கின்றனர்

.காற்றினால் உருவாகும் இந்த நீரோட்டத்தை போல, கடல் நீரின் வெப்பநிலை மாறும்போதும் நீரோட்டம் உருவாகிறது. சாதாரண தண்ணீர் 0 (ஜீரோ டிகிரி) யில் உறைந்து விடும் ஆனால் கடல் நீரில் உப்பு இருப்பதால் -4 (மைனஸ் நான்கு டிகிரி) யில் மட்டுமே உறைந்து பனிக்கட்டியாகும். ஆர்க்டிக் மற்றும் அண்டார்டிகா போன்ற துருவப்பகுதிகளில் உள்ள கடல்நீர் பனிக்கட்டியாக மாறாமல், அதே சமயம் குளிர்ச்சியாகவும், அடர்த்தி அதிகமாகவும் இருப்பதால் எடை அதிகரித்து கீழ்நோக்கி அழுத்தப்படுகிறது. இந்த குளிர்ந்த கடல் நீர் கடல் அடிப்பகுதியில் ஆழ்கடல் நீரோட்டமாக மாறி பூமத்திய பகுதி நோக்கி மெதுவாக நகர்கிறது. இதனால் துருவ கடல் பகுதியின் மேல்பரப்பில் ஏற்படும் வெற்றிடத்தை நிரப்ப, பூமியின் வெப்பமான மத்திய பகுதியில் உள்ள கடல் நீரானது ஒரு மேல்பரப்பு வெப்ப நீரோட்டமாக மாறி துருவத்தை நோக்கி ஓடுகிறது. ஒரு மாபெரும் நீர்சக்கரம் மிக மெதுவாக சுழல்வதை போல இந்த நிகழ்வு கடலுக்கடியில் தொடர்ந்து நகர்ந்து கொண்டே இருக்கிறது. இந்த வெப்ப அல்லது குளிர் நீரோட்டங்கள் பயணிக்கும்போது, அதன் வெப்பமோ அல்லது குளிர்ச்சியோ காற்றுக்கு கடத்தப்பட்டு, அதனருகில் உள்ள நாடுகளின் வெப்பநிலையை மாற்றுகின்றன.

நடுக்கடலின் மேற்பரப்புநீர் கண்ணாடி போன்று மிக தெளிவாகவும், ஊட்டச்சத்து குறைவாகவும் காணப்படும். எனவே ஆங்கிலத்தில் இதை நீலப்பாலைவனம் (blue desert) என்று அழைப்பார்கள். நிலத்தில் ஓடி கடலில் பாய்கின்ற ஆற்றின் மூலமாகவோ அல்லது கடல் நீரோட்டங்கள் மூலமாகவோ மட்டுமே இந்த கடல் நீர் சத்து மிகுந்ததாக மாற்றப்படுகிறது. நாம், முதலில் குறிப்பிட்ட ஆழ்கடல் நீரோட்டங்கள், கடலின் அடிப்பகுதியில் செல்லும்போது கடலடி பரப்பில் படிந்துள்ள ஊட்டசத்துக்களை கிளறி தன்னுடன் இழுத்து செல்கிறன. இவை, ஆழம் குறைவான கரைப்பகுதியில் மோதும்போது மேலே எழும்பி, ஆழ்கடலின் சத்துபொருட்களை மேலே கொண்டு வருகின்றன. இந்த செயலினால், கடல்நீர் வளமிக்கதாக மாறி அதில் ஏராளமான நுண்ணிய தாவர மற்றும் விலங்கு உயிரினங்கள் உற்பத்தி ஆகின்றன. அதை தொடர்ந்து, இவற்றை சாப்பிட கூடிய சிறு மீன்களும் பெரிய மீன்களும் உற்பத்தியாகி கடலின் மீன்வளம் அதிகரிக்கின்றது, இதனால் மீன்பிடி தொழிலில் நல்ல வருமானமும் கிடைக்கிறது.

நம் அண்டை மாநிலமான கேரளாவில் ஒவ்வொருவருடமும் மே முதல் செப்டம்பர் வரை தென்மேற்கு பருவக்காற்று வீசும் காலங்களில், கடல்நீரோட்டங்கள் கேரள கடற்கரையை நோக்கி கடலடியில் படிந்துள்ள சத்துப்போருட்களை மேலே கொண்டு வருகின்றன. இதனால் பெருகும் சிறு உயிரினங்களை சாப்பிட்டு, இறால்கள் மற்றும் மத்திக்கவளை மீன்கள் ஏராளமாக உற்பத்தி ஆகின்றன. இந்த சீசனில் பெருமளவில் பிடிக்கப்படும் இந்த வகை இறால்களும் மீன்களும், அம்மாநில கடலோர கிராம பொருளாதார மேம்பாட்டில் முக்கிய பங்கு வகிக்கின்றன.

இந்த கடல் நீரோட்டங்கள் அனைத்தும் ஒரே விதமான வேகத்தில் இருப்பதில்லை. தீவுகளுக்கு இடையே ஓடும கடல் நீரோட்டங்களும், இரண்டு கடல்களுக்கு இடையே உள்ள நீரிணைப்பில் ஓடும் கடல் நீரோட்டங்களும் அதி வேகமானவை. கடந்த 2009 ஆம் வருடம், பிலிப்பின்ஸ் நாட்டிற்கு செல்ல வாய்ப்பு எனக்கு கிடைத்தபோது தீவுகளுக்கு இடையே அதிவேக நீரோட்டங்களில் மாட்டிகொண்ட அனுபவம் எனக்கு ஏற்பட்டது. சுமார் ஏழாயிரம் தீவுகள் கொண்ட அந்த நாட்டில் நெக்ரோஸ் என்ற தீவுக்கு அருகில் இருந்த ஒரு சிறிய குட்டி தீவுக்கு செயற்கையாக பவளப்பாறைகள் வளர்க்கப்படுவதையும், ஜெயன்ட் க்ளாம்ப்ஸ் (giant clams) என அழைக்கப்படும் உலகின் மிகப்பெரிய சிப்பி வகைகள் இருப்பதையும் பார்ப்பதற்காக ஒரு குழுவாக சென்றோம். எங்கள் குழுவில் வெவ்வேறு நாடுகளை சேர்ந்த கடல் ஆராய்ச்சியாளர்களும், சுற்று சூழல் ஆர்வலர்களும் வந்திருந்தனர். வெள்ளை நிற மணலும், பளிங்கு போன்ற தண்ணீருடனும் மிகவும் ரம்யமாக காட்சியளித்த அந்த தீவை சுற்றி அலைகளே இல்லாமல் மிகவும் அமைதியாக இருந்தது.

I was excited to dive in Philippine coral reefs

நீளவாக்கில் இருந்த அந்த தீவிலிருந்து சுமார் ஒரு கிலோ மீட்டர் தொலைவில் செயற்கை பவளப்பாறைகள் வளர்க்கப்படும் இடம் இருப்பதாக எங்களை அழைத்து சென்ற வழிகாட்டி சொன்னார். ஆர்வகோளாறில் நானும் என்னுடன் வந்திருந்த இரண்டு பிலிப்பைன்ஸ் நாட்டு நண்பர்களும் சிலிண்டர் போன்ற எந்தவித பாதுகாப்பு உபகரணங்களும் இன்றி அதை பார்ப்பதற்காக நீந்த துவங்கினோம். காலில் துடுப்பும் முகத்தில் நீரடி கண்ணாடியும் அணிந்து இருந்ததால், அவ்வபோது கடலுக்குள் மூழ்கி சென்று மீன்களையும், பவளப்பாறைகளையும் ரசித்து கொண்டு உற்சாகத்துடன் நீந்தி சென்று கொண்டு இருந்தோம். அரைமணி நேரத்தில் செயற்கை பவளப்பாறை வளர்க்கும் இடத்திற்கு நீந்தி வந்தடைந்தோம். அங்கு சுமார் 20 அடி ஆழத்தில் வைக்கப்பட்டு இருந்த செயற்கை பவளப்பாறைகள் கூண்டை சுற்றிலும் ஏராளமான மீன்கள் நீந்தி கொண்டு இருந்தது கண்கொள்ளா காட்சியாக இருந்தது. சிறிது நேரம் கழித்து, இளைப்பாற எந்த வழியும் இல்லாததால் மூவரும் தொடர்ந்து நீந்தி மீண்டும் கரைக்கு வர முடிவு செய்தோம்.

Snorkeling in a cave at Borakay island. I free dived under a rock in the cave to reach the open sea. Such a beautiful sea with its own hidden dangers.

ஆனால், நாங்கள் வரும்பொழுது இருந்ததை விட கடலின் நீரோட்டம் திசை மாறி, வேறு திசையில் வேகமாக இழுப்பதை அப்போதுதான் உணர ஆரம்பித்தோம். நாங்கள் கிட்டதட்ட தீவின் முனைப்பகுதிக்கு நீந்தி வந்துவிட்டதால் நீரோட்டத்தில் நடுவில் நன்றாக சிக்கி கொண்டோம். நம் ஊர் ஆற்றில் தண்ணீர் ஓடுவதை போன்ற அதன் வேகத்தில் ஒரு அடி எதிர்த்து நீந்தினால் நான்கு அடி பின்னோக்கி தள்ளியது. அதற்கு மேல் எதிர்த்து நீந்த முடியாது என்பதால் அதன் போக்கிலேயே சுமார் ஒரு கிலோமீட்டர் தூரம் நீந்தி சென்றோம். அதிர்ஷ்டவசமாக, நீளமான அந்த தீவின் கரைக்கு இணையாக நீரோட்ட திசை இருந்ததால், அதன் வழியாகவே நீந்தி சென்று தீவின் மற்றொரு இடத்தில் கரை சேர்ந்தோம். பலர் இப்படி நீரோட்டங்களில் ஆபத்தில் சிக்கி கொள்ளும் சம்பவங்கள் உலகெங்கும் அடிக்கடி நடந்து கொண்டுதான் இருக்கின்றன. அந்த நிலையில் தைரியமாக இருப்பதும், நன்றாக நீச்சல் தெரிவதும் மட்டுமின்றி கடலின் இயல்பை பற்றிய அறிவும் இருந்தால் தப்பி உயிர் பிழைக்க முடியும்.

After swimming out of the cave under a 20 feet rock.

கோடியக்கரைக்கும் யாழ்பாணத்திற்கும் இடையில் உள்ள 55 கி.மி குறுகிய கடலில் ஒரு வலிமையான நீரோட்டம் வடக்கு நோக்கியும், தெற்கு நோக்கியும் மாறி மாறி எப்போதும் ஓடி கொண்டு இருக்கின்றது. வேதாரண்யம் பகுதியை சேர்ந்த ஒரு வயதான மீனவர் கூறியபடி “நீரோட்டத்தை எதிர்த்து இந்த பகுதியில் ஒரு படகை அதன் முழு வேகத்தில் இயக்கினாலும், அது ஒரு அடி முன்னேறி செல்வது கூட மிக கடினமாக இருக்கும். மேலும், ஒரு படகு விபத்தில் ஆழமற்ற பகுதியில் மூழ்கினால் கூட உடனே அதை கரைக்கு கொண்டு வந்து விட வேண்டும், இல்லையெனில் நீரோட்டத்தினால் அரித்து வரப்படும் மணல் அதை வேகமாக மூடிவிடும்” என்று கூறினார். இந்த வார்த்தைகள் கடல் பற்றிய அவரின் ஆழ்ந்த அனுபவத்தை வெளிப்படுத்துவதாக இருந்தது.

மீனவர்களுக்குள்ள பரம்பரையான கடல்சார் அனுபவ அறிவை எண்ணி வியக்கும் அதே வேளையில், கடல் வழியாக படையெடுத்து சென்ற பண்டைகால தமிழக மன்னர்களும், திரை கடல் ஓடி திரவியம் தேடிய பழந்தமிழர்களையும் எண்ணிப்பார்த்தால், அவர்களுக்கு இந்த கடல் நீரோட்டங்கள் பற்றிய அபாரமான அறிவு இருந்திருக்க கூடும் என உணர முடிகிறது.

இந்தோனேசியாவில் பேசப்படும் பாலி என்ற மொழியை தாய்மொழியாக கொண்ட என்னுடைய நண்பரிடம் பேசி கொண்டு இருக்கும்போது, யதார்த்தமாக, பாலி மொழியின் உள்ள உயிர் மற்றும் மெய் எழுத்துக்களை உச்சரிக்குமாறு கேட்டேன். அவர் இந்தியாவிற்கு இதுவரை வந்ததே இல்லை, மேலும் அவருக்கு தமிழ் மொழி பற்றி எதுவுமே தெரியாது. ஆனால், பாலி மொழியின் உயிர்மெய் எழுத்துகளை அவர் சொன்னபோது, அவை தமிழ் மொழியின் அத்தனை உயிர்மெய் எழுத்துக்களை போல இருந்தது.

இதிலிருந்து, பண்டைய கால தமிழர்கள் அந்த தீவுகளுக்கு சென்று நமது கலாச்சாரத்தையும், மொழியையும் பரப்பி இருக்கின்றார்கள் என்பதையும் இன்னும் அந்த நாட்டு மக்கள் அவற்றையே பயன்படுத்துகிறார்கள் என்பதையும் ஆதாரப்பூர்வமாக தெரிந்து கொள்ள முடிகிறது. பாலி மொழிக்கும் தமிழுக்கும் உள்ள தொடர்பு பற்றிய ஆய்வு இளம் தமிழ் ஆராய்ச்சியாளர்களுக்கு தலைப்பாக இருக்கலாம் என்று நினைக்கின்றேன். எனவே, கடல் காற்றை பற்றியும், நீரோட்டங்கள் பற்றியும் தெளிவான புரிதல் இல்லாமல் நாகப்பட்டினத்திலிருந்து நாலாயிரத்து ஐநூறு கி.மி தொலைவுள்ள பாலி தீவுக்கு பழந்தமிழர்கள் சென்று இருக்க இயலாது.

பண்டைய தமிழரின் கடல் வாணிகத்தில் கடல் நீரோட்டங்கள் எந்த அளவுக்கு முக்கிய பங்கு வகித்திருக்க கூடும் என்பதற்கு ஒரு உதாரணத்தை பார்ப்போம்.

ஒரு பாய்மர கப்பலில் தமிழகத்திலிருந்து கடல் வழியாக பர்மா செல்ல வேண்டுமானால் தென்னங்காற்று (தென்கிழக்கு பருவக்காற்று) வீசும் காலங்களில் ஓடும் உறுதியான தெண்டி வெள்ளத்தை (தெற்கிலிருந்து வடக்கு நோக்கி ஓடும் கடல் நீரோட்டம்) பயன்படுத்தி எளிதாக சென்றிருப்பார்கள். அது போலவே, பர்மாவிலிருந்து தமிழகத்திற்கு திரும்பி வர வாடை காற்று (வடகிழக்கு பருவக்காற்று) வீசும் காலங்களில் கடலில் ஓடக்கூடிய வலிமையான வன்னி வெள்ளத்தை (வடக்கிலிருந்து தெற்கு நோக்கி ஓடும் கடல் நீரோட்டம்) பயன்படுத்தி வந்து சேர்ந்திருப்பார்கள். தெண்டி வெள்ளம், வன்னி வெள்ளம் போன்ற பழந்தமிழ் வார்த்தைகள் இன்றும் தமிழக மீனவர்களால் பயன்படுத்தபடுகின்றன. மேலும், எனது முந்தைய கட்டுரையில் குறிப்பிட்ட படி பல வகையான கடல் மீன்களின் தமிழ் பெயர்களும் காலம் காலமாக இன்னும் மீனவர்களிடையே வழக்கில் இருந்து வருகின்றன. ஆனால், தற்போது அதிகரித்து வரும் சுற்று சூழல் சீர்கேட்டால், தமிழக கடலில் ஒரு மீன்வகை அழிந்து விட்டால், அத்துடன் ஒரு பழந்தமிழ் சொல் பயன்பாட்டையும் நாம் முற்றிலும் இழந்து விடுகிறோம் என்று நினைக்கின்றேன்.

பொருளாதார, அரசியல் மற்றும் சுற்றுசூழல் பாதிப்பு என மற்ற எல்லா காரணங்களையும் ஒதுக்கி வைத்து விட்டு யதார்த்தமாக பார்க்கும்போது, இன்று இந்த பகுதியில் வெட்டப்பட்ட சேது சமுத்திர திட்டம் பாதியில் நின்று போனதற்கு இந்த அதிவேக நீரோட்டங்களும் ஒரு முக்கிய காரணமாகும். அட்லாண்டிக் கடலையும், பசிபிக் பெருங்கடலையும் இணைக்கும் பனாமா கால்வாயும், எகிப்து நாட்டின் சூயஸ் கால்வாயும் வெற்றிகரமாக இயங்கும்போது சேது சமுத்திர கால்வாய் மட்டும் ஏன் கடினமான பணியாக இருக்கின்றது என்று நீங்கள் கேட்கலாம்?

இதை ஒரு எளிமையான உதாரணம் மூலம் விளக்க விரும்புகிறேன். இரண்டு குளங்களை இணைப்பதற்கு நிலத்தில் வெட்டப்படும் வாய்க்கால் போல இரண்டு கடல்களை இணைக்க நாம் வாழக்கூடிய நிலத்தில் வெட்டப்பட்டவைதான் இந்த சூயஸ் கால்வாயும், பனாமா கால்வாயும் ஆகும். அதனால், அவற்றின் கரைகள் உறுதியாக இருக்கின்றன .

ஆனால், சேது சமுத்திரம் திட்ட பணியானது, நம் கொள்ளிடம் ஆற்றில் முழுவதும் தண்ணீர் போய்கொண்டு இருக்கும்போது, ஆற்றின் நடுவில் ஒரு அடி அகலத்திற்கு சிறு வாய்க்காலை நீங்கள் வெட்ட முயற்சிப்பது போல ஆகும். எத்தனை தடவை கடினமாக உழைத்து நீங்கள் மண்ணை அள்ளி கொட்டினாலும், ஆற்றின் நீரோட்டம் மணலால் மீண்டும் அதை எளிதாக மூடிவிடும். அதை போல, இந்தியாவிற்கும் இலங்கைக்கும் இடைப்பட்ட பகுதியில் கடல் அடியில் உள்ள மணலில் எத்தனை முறை கால்வாய் வெட்டினாலும் சக்தி வாய்ந்த கடல் அடிப்பகுதி நீரோட்டங்கள் எளிதாக அதை மூடிவிடும். ஏனெனில் கடலுக்கு அடியில் ஒரு இடம் பள்ளமாக இருக்க வேண்டுமா அல்லது மேடாக இருக்க வேண்டுமா என்பதை கடல் நீரோட்டங்கள்தான் நிர்ணயிக்கின்றன.

கட்டுரையை எழுதியவர்

டாக்டர். வே. பாலாஜி

கடல் வாழ் உயிரின ஆராய்ச்சியாளர்

பட்டுக்கோட்டை